पिपरामा अनिल रुंगटाको स्पष्ट सन्देश: बन्द कोठाबाट होइन, जनताकै बीचमा बसेर राजनीति

वीरगंज १८ माघ । पर्सा क्षेत्र नं. १ बाट नेपाली कांग्रेसका उम्मेदवार अनिल कुमार रुंगटाले पिपरा गाउँका अगुवा कार्यकर्तासँगको भेटघाटमा पुरानो ढर्राको राजनीति त्यागेर जनमुखी सेवामा केन्द्रित हुने स्पष्ट प्रतिबद्धता व्यक्त गरेका छन्।
कार्यक्रमलाई सम्बोधन गर्दै रुंगटाले भने, “अब बन्द कोठामा बसेर राजनीति गर्ने समय सकियो। जनताकै बीचमा बसेर, जनताकै लागि सेवा गर्ने मेरो लक्ष्य हो।” उनले पुरानो पारिपाटीको राजनीति अब आवश्यक नरहेको उल्लेख गर्दै प्रत्यक्ष संवाद र सहभागितामूलक राजनीतिलाई प्राथमिकता दिनुपर्ने बताए।
रुंगटाले “Men to Men” भेटघाटमार्फत जनताका समस्या, चाहना र अपेक्षा बुझ्न जरुरी रहेको बताउँदै, आफू सधैं जनतासँगै रहने प्रतिबद्धता जनाए। पर्सा क्षेत्र नं. १ अन्तर्गत विशेषगरी पिपरा–बासिलाई शिक्षा र स्वास्थ्य क्षेत्रको अवस्था सुधार गर्ने ठोस योजना सहित अघि बढ्ने उनले स्पष्ट पारे।
कार्यक्रममा पिपराका बूथ सभापति विशेश्वर प्रसाद पटेल, विशेष अतिथिका रूपमा नेपाली कांग्रेस पर्साका उपसभापति रामनारायण कुर्मी, साथै वीरगञ्ज, पिपरा र गण्डक क्षेत्रका कांग्रेसका अगुवा नेता तथा कार्यकर्ताहरूको उल्लेखनीय उपस्थिति रहेको थियो।
स्थानीय कार्यकर्ताहरूले पनि रुंगटाको जनमुखी सोच र प्रत्यक्ष संवादको पहललाई सकारात्मक रूपमा लिँदै चुनावी अभियानलाई थप सशक्त बनाउने प्रतिबद्धता व्यक्त गरेका थिए।