तराईमा छठ पर्व शुरु

बीरगञ्ज १ मंसिर।
निष्ठा र कठोर ब्रत लिएर मनाइने हिन्दु धर्मावलम्बीहरुको साझा सांस्कृतीक प्रतिविम्बको चाड छठ पर्व शुक्रबार देखि विधिवत सुरु भएको छ । सत्य र अहिंसाप्रति मानवको रुचि बढाउने तथा सबै जीवप्रति सहानुभूति राख्न अभिप्रेरित गर्ने चाडका रुपमा रहेको छठ पव शुक्रवार बाट विधीवतरुपमा सुरु भएको हो ।
कात्तिक शुक्ल पक्षमा चार दिनसम्म मनाइने छठ पर्वको पहिलो दिन अर्थात शुक्रबारको दिनलाई नहाए खाए (नुहाउने खाने) दिन पनि भन्ने गरिन्छ ।
छठ पर्बको पहिलो दिन शुक्रबार छठका व्रतालुले खोला, नदी, पोखरी र तलाउ लगायतका जलाशयमा नुहाइ धुवाई गरेर शुद्ध भइ बिहान र बेलुकी लसुन र प्याज नभएको चोखो शाकाहारी खाना खाने गर्छन ।
छठको दोश्रो दिन शनिवार अर्थात् पञ्चमी तिथिको दिनलाई ‘खरना’ भनिन्छ । खरनाका दिन व्रतालु दिनभरि निर्जला व्रत बस्छन् र साँझपख नुहाएर चोखो हुँदै आफ्नो कुल देवताको पूजा कोठामा माटोको नयाँ चुलो बनाएर त्यसैमा चामल र भेलीको (सख्खर) खीर (रसीआव) तथा गहुँको रोटी प्रसादका रुपमा पकाउँछन् ।
उक्त प्रसाद अर्थात् रसीआव रोटी चन्द्रोदयपछि चन्द्रमालाई चढाएर पूजापाठ गरेपछि ब्रतालु उक्त प्रसाद ग्रहण गरेर निर्जला ब्रत बस्छन् ।
तराईमा छठ पूजाको तयारी तिब्र
र्पसा बारा लगायत तराईका जिल्लामा छठ पूजाको तयारी भइराखेको छ । मंसिर ३ गते आईतबार परेको छठ पूजाका लागि मध्य तराईका जिल्लामा छठी घाटमा सरसफाई, सजावट र व्यवस्थापनका काम तिब्र बनाइएकोछ । वीरगन्जको घडीअर्वा पोखरी, स्वीमीङ पुल परिसर, रानीघाट, छपकैया, नगवा, मुर्ली, पिपरा गरि दुई दर्जन भन्दा बढी स्थानमा छठघाट बनाइएको छ ।
यस्तै पर्साको ग्रामीण क्षेत्रका रामगढवा, पोखरीया, बहुअरी, भिस्वा, लंगडी, सेढवा, धोरे, विन्दवासीनी लगायतका गाँउमा रहेका पोखरी, तलाउ र नदी छेउमा पनि छठघाटको सजावटको काम भइरहेको छ ।
मुलुकमै छठपूजाका लागि ख्याती कमाएको वीरगन्जको घडीअर्वा पोखरी परिसरमा छठघाट सजाउने काम विशेष रुपमा भइरहेडको छ ।
घडीअर्वा पोखरी छठघाटमा पन्डाल, बिजुलबत्ती र फूलको सजावटमा मात्रै यसपाली १५ लाख भन्दा बढि रुपैयाँ खर्च गरिएको घडीअर्वा छठपूजा व्यवस्थापन समितिका सचिव लखनलाल साहले बताए । विगतका वर्षहरु भन्दा यसपाली अझ व्यवस्थित र सुन्दरताका साथ छठघाटलाई सजाउने काम भइरहेको सचिव साहले बताए ।
घडीअर्वा छठघाटमा आईतबार साँझ र साेमबार बिहान गरि करिब दुई लाख ५० हजार भन्दा बढि भक्तजन र दर्शनार्थी आउने अनुमान गरिएको समितिका अध्यक्ष दिप कुमार कानुले बताए । छठका ब्रतालु मात्रै चार हजार दुई सय जति यहा आएर छठी माता र सूर्य भगवानको पूजाअर्चना गर्छन ।
छठपूजाका दिन घडीअर्वा छठघाटमा आउने भक्तजन र दर्शनार्थीको सुरक्षाका लागि नेपाल प्रहरी सशस्त्र प्रहरी र घडीअर्वा स्पोटर्स क्लबका स्वयंसेवक परिचालन गर्ने गरि योजना बनाइएको पर्साका प्रहरी उपरिक्षक काेमल साहले जनाए । घडीअर्वा छठको चार वटै प्रवेशद्वारमा सिसिटिभी क्यामेरा जडान गरिने उनले जानकारी दिए ।