संविधान बचाउन युवाहरू एकजुट हुनुपर्नेमा वीरगञ्जमा जोड

वीरगंज २५ भदौ  ।
निषेधाज्ञाबीच वीरगञ्जको घण्टाघरमा बिहीबार साँझ नेपाली कांग्रेस निकट युवाहरूले संविधानको किताब हातमा लिएर प्रदर्शन गरेका छन्। संविधान र लोकतान्त्रिक व्यवस्थाको संरक्षण मागसहित उनीहरूले राष्ट्रपति रामचन्द्र पौडेललाई सार्वजनिक गर्नुपर्ने आवाज पनि उठाए।
घण्टाघर परिसरमा भेला भएका युवाहरूले संविधान नै सर्वोच्च मूल्य भएको र यसको रक्षाका लागि देशभरका युवाहरू एकजुट हुनुपर्नेमा जोड दिए। उनीहरूले नाराबाजीसँगै संविधानको पाना देखाउँदै लोकतन्त्रको भविष्य पुस्तामै निर्भर रहेको चेतना जगाउने प्रयास गरेका थिए।
कार्यक्रमको संयोजन नेपाली कांग्रेस पर्साका क्षेत्रीय सभापति मोहम्मद साहबुद्दिनले गरेका थिए। प्रदर्शन शान्तिपूर्ण ढंगमा सम्पन्न भए पनि यसले वीरगञ्जलाई संविधान र लोकतन्त्रप्रतिको प्रतिबद्धताको स्पष्ट सन्देश दिएको छ।