हिन्दू–मुस्लिम सद्भावको सन्देश फैलाउँदै कांग्रेस नेता साहबुद्दिन, शक्तिपीठदेखि मन्दिरसम्म प्रार्थना

असोज ४ पर्सा । हिन्दू–मुस्लिमबीच आपसी सद्भाव, धार्मिक सहिष्णुता र सामाजिक एकता कायम गर्ने उद्देश्यसहित नेपाली कांग्रेस पर्साका नेता मोहम्मद साहबुद्दिन सक्रिय देखिएका छन्।
दुर्गा नवमीको अवसरमा मालपोतस्थित माता निशान भगवती मन्दिरमा आयोजित पूजाआजा तथा बलि कार्यक्रममा साहबुद्दिन सहभागी भएका थिए। सो अवसरमा उनले मन्दिरका हाकिमसाहेब तथा स्थानीयवासीसँग भेटघाट गर्दै धार्मिक आस्था, सामाजिक एकता र आपसी सद्भावको महत्त्वलाई जोड दिएका थिए।
बहुल समुदायको बसोबास रहेको नेपाली समाजमा अल्पसंख्यक समुदायमाथि हुने विभेद, घृणा र द्वन्द्वलाई अन्त्य गर्नुपर्ने धारणा राख्दै साहबुद्दिनले हिन्दू–मुस्लिमबीचको दूरी घटाउने प्रयास गरिरहेका छन्। समाजमा धार्मिक तथा सामुदायिक सद्भाव कमजोर पार्ने तत्वहरू निरुत्साहित होऊन् र सबै समुदायले समान सम्मान तथा अधिकारका साथ जीवनयापन गर्न पाऊन् भन्ने उनको चाहना रहेको छ।
यसै सन्देशलाई आत्मसात् गर्दै साहबुद्दिनले दीर्घमाता लगायत विभिन्न शक्तिपीठमा पुगेर प्रार्थनासमेत गरेका छन्। धार्मिक आस्थाभन्दा माथि उठेर सामाजिक एकता र आपसी विश्वासलाई बलियो बनाउनुपर्ने उनको प्रयासले धार्मिक सहिष्णुताको सन्देश दिएको छ।
“हाम्रो समाज मिलिजुली समाज हो। बहुसंख्यक र अल्पसंख्यकबीच विभेद होइन, आपसी सम्मान, सद्भाव र सहकार्य हुनुपर्छ” भन्ने मान्यतासहित साहबुद्दिनले समुदायबीचको सम्बन्ध सुमधुर बनाउन निरन्तर प्रयास गरिरहेको देखिन्छ।
धार्मिक विविधताबीच एकता कायम राख्नु आजको समाजको आवश्यकता हो। यस्तो अवस्थामा विभिन्न समुदायका धार्मिक तथा सांस्कृतिक गतिविधिमा सहभागिता जनाउँदै सद्भावको पक्षमा उभिने प्रयासले सामाजिक एकता र सहअस्तित्वको महत्त्वलाई थप उजागर गरेको छ।